Manchester United oo ceeb kale la kulantay kadib guuldarro ka timid Grimsby Town

 Manchester United oo ceeb kale la kulantay kadib guuldarro ka timid Grimsby Town

Kooxda Manchester United ayaa gaartay heer hoose oo taariikhi ah kadib markii ay ka hareen koobka League Cup ee Ingiriiska, iyadoo lagu reebay wareega labaad ay ku wajahday kooxda heerka afraad ee Grimsby Town.

Ciyaarta ayaa ku dhammaatay 2-2 waqtigii caadiga ahaa, United-na waxay u baahneyd goolal dambe oo ay dhaliyeen Bryan Mbeumo iyo Harry Maguire si ay natiijada u barbareeyaan, kadib markii ay 2-0 ku hoos mareen qeybtii hore. Markii la gaadhay rigooreyaal, Grimsby ayaa guul taariikhi ah ku gaaray 12-11, iyadoo Mbeumo uu ku guuldareystay rigooradii ugu dambeysay.

Natiijadani waxay noqotay mid ka mid ah ceebaha ugu waaweyn ee taariikhda United, iyadoo kooxda uu hoggaamiyo Ruben Amorim ay wali guul la’aan tahay seddexdii kulan ee ugu horreeyay xilli-ciyaareedkan, kadib markii ay ku dhammeysteen kaalinta 15aad horyaalka xilli-ciyaareedkii hore.

Ciyaartoyda Grimsby oo ay ku jireen da’yaro ka yimid akadeemiyadda iyo xiddig ka socda jasiiradaha Faroe Islands ayaa la dabaaldegay taageerayaashooda oo garoonka soo galay kadib guushaas taariikhiga ah. Charles Vernam oo ka mid ahaa dhaliyeyaasha Grimsby ayaa sheegay: “Waa dareen cajiib ah oo aan weligeen ilaawi doonin.”

Dhanka kale, United oo 200 milyan oo gini ku qarash gareysay weeraryahanada cusub – Mbeumo, Matheus Cunha iyo Benjamin Sesko – ayaa wali la daalaa dhacaysa. Cunha ayaa isna ku fashilmay rigoorada kadib markii lagu qabtay kubad daciif ah.

Guuldarradan ayaa cadaadis kale ku kordhisay tababare Amorim, kaas oo helay kaliya 16 guul 44 kulan oo uu United hoggaamiyey tan iyo markii la keenay bishii November.

Taariikhdu way isu celisay, maadaama United markii ugu dambeysay ee ay ku dheeshaan wareega labaad sanadkii 2014 ay 4-0 kaga hareen kooxda MK Dons oo heerka saddexaad ahayd.