Qatar iyo Soomaaliya oo Saxiixay Heshiisyo Istaraatiiji ah oo Lagu Xoojinayo Iskaashiga Labada Dal

Qatar iyo Soomaaliya oo Saxiixay Heshiisyo Istaraatiiji ah oo Lagu Xoojinayo Iskaashiga Labada Dal

Dooxa ayaa maanta martigelisay kulankii ugu horreeyay ee guddiga wadajirka ah ee Soomaaliya iyo Qatar, waxaana guddoomiyey Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaan Cabdi Cali, oo uu weheliyo wafdi heer sare ah. Kulankan ayaa calaamad u noqday xoojinta xiriirka labada dal iyo dhismaha iskaashi cusub oo istaraatiiji ah.

Guddigan oo dhowaan ay si rasmi ah u sameeyeen dowladaha Soomaaliya iyo Qatar, waxa uu ujeedkiisu yahay kordhinta saaxiibtinimada, xoojinta isku xirnaanta siyaasadeed, iyo horumarinta mashaariicda labada dhinac u wada dan ah. Waxaa sidoo kale lagu tirinayaa tallaabo ka turjumaysa sida ay labada dal ugu heelan yihiin inay dhisaan xiriir mustaqbal fog leh.

Intii kulanku socday, Wasiir Cabdisalaan iyo Wasiirka Dowladda ee Arrimaha Dibadda Qatar, Suldaan bin Sacad Al-Muraikhi, ayaa saxiixay heshiisyo dhowr ah oo muhiim u ah kobcinta iskaashiga labada dal. Heshiisyadan ayaa diiradda saaraya dhinacyo kala duwan oo wax-ku-ool ah oo ay ka mid yihiin dhaqanka, kastamka, dhalinyarada, iyo beeraha.

Qaybta dhaqanka iyo dhaxalka, labada dowladood waxay isla garteen in la xoojiyo ilaalinta taariikhda, kobcinta maktabadaha iyo keydinta qoraallada muhiimka ah, abaabulka bandhigyo farshaxan iyo dhaqameed, iyo ka qaybgalka carwooyinka buugaagta caalamiga ah. Tani waxay kor u qaadaysaa fahamka dhaqameed ee labada bulsho iyo isdhaafsiga khibradaha hal-abuurka.

Dhanka kastamka, waxaa la saxiixay heshiis lagu hormarinayo nidaamyada casriga ah ee canshuuraha, laguna xoojinayo la dagaallanka dambiyada kastamka, si loo hubiyo in qiimeynta canshuuraha si hufan loo maareeyo, lana ilaaliyo habraacyada gobolka iyo kuwa caalamiga ah. Tani waxay kaalin weyn ka qaadan doontaa kor u qaadista hufnaanta ganacsiga iyo socdaalka badeecadaha.

Dowladuhu sidoo kale waxay isku raaceen in la xoojiyo iskaashiga dhalinyarada, iyagoo ballan qaaday in la kordhiyo tababarro, shirar iyo aqoon-kororsi u gaar ah maamulka mashaariicda, hoggaaminta, iyo fursadaha xirfadeed. Tani waxay dhalinyarada Soomaaliyeed u fureysaa waddooyin badan oo horumar shaqo iyo xirfad ah.

Sidoo kale, labada dal waxay wadaan diyaarinta heshiis ku saabsan beeraha iyo amniga cuntada, kaas oo lagu horumarinayo farsamooyinka wax-soosaarka, isdhaafsiga cilmi-baarista iyo xogaha sayniska, iyo abaabulka shirar iyo tababaro lagu hormarinayo aqoonta beeraleyda. Tani waxay muhiim u tahay Soomaaliya oo dadaal ugu jirta kordhinta wax-soo-saarka gudaha.

Dowladda Soomaaliya waxay sheegtay in heshiisyadan ay ka tarjumayaan sida labada dal ugu go’an tahay dhismaha iskaashi istaraatiiji ah oo horseeda horumar waara, koboc dhaqaale, iyo xiriir ku dhisan dan wadaag. Waxaana la filayaa in tani ay fursad muhiim ah u noqoto mashaariic cusub iyo ballaarinta taageerada Qatar ee Soomaaliya.