Soomaaliya oo Daahfurtay Sanduuqa Qaranka ee Cimilada

 Soomaaliya oo Daahfurtay Sanduuqa Qaranka ee Cimilada

Jamhuuriyadda Federaalka Soomaaliya ayaa qaaday talaabo taariikhi ah kadib markii si rasmi ah loo daahfuray Sanduuqa Qaranka ee Cimilada, kaas oo noqday hannaan dhexe oo lagu ururiyo laguna maamulo maalgelinta caalamiga ah ee mashaariicda la xiriira cimilada. Tani waxay ku soo beegmaysaa xilli Soomaaliya ay wajahayso abaaro soo noqnoqda, fatahaado iyo xaalado cimilo oo aad u daran.

Sanduuqan ayaa si rasmi ah u shaqeeyay intii lagu jiray shir labo maalmood socday oo ka dhacay Muqdisho (Agoosto 27–28), kaas oo ay ka qeyb galeen in ka badan 60 mas’uul oo dowladeed, wakiillo ganacsi iyo ururo bulshada rayidka. Shirkan ayaa lagu ansixiyay qorshaha sanadlaha ah iyo khariidadda wadada, iyadoo sidoo kale lagu soo bandhigay Tijaabada Maalgelinta Cimilada Soomaaliyeed oo ah mashruuc hordhac ah oo Soomaaliya ku xireysa maalgelinta waaweyn ee caalamiga ah sida Green Climate Fund, Adaptation Fund iyo Global Environment Facility.

Wasiirka Maaliyadda Bihi Imaan Egeh, oo ah guddoomiyaha guddiga sanduuqa, ayaa sheegay in maalgelinta cimilada ay hadda noqotay “mudnaan istaraatiiji ah.”

“Hannaankan cusub wuxuu noo suurto-gelinayaa inaan si hufan uga jawaabno caqabadaha degdegga ah, isla markaana aan qorsheyno mustaqbal adkeysi leh oo waara,” ayuu yiri.

Daahfurka waxaa si wadajir ah u guddoominayay Wasiirka Deegaanka iyo Isbeddelka Cimilada Lt. Gen. Bashiir Maxamed Jaamac, kaas oo carabka ku dhuftay in Soomaaliya ay qaadaneyso qaab “dowlad dhan” ah oo lagu wajahayo maalgelinta cimilada.

Xafladda xiritaanka, agaasimaha fulinta ee sanduuqa Liban Obsiye, ayaa xusay muhiimadda ay leedahay iskaashiga:

“Helitaanka maalgelinta cimilada waxay ku saabsan tahay buuxinta baahida qaranka ee degdegga ah iyo sidoo kale maalgelinta xasilloonida fog iyo ilaalinta bulshooyinka nugul ee ay saameynayaan isbeddelka cimiladu.”

Sanduuqan waxaa lagu aasaasay xeer madaxweyne uu saxiixay Madaxweyne Xasan Sheekh Maxamuud, wuxuuna mideynayaa wasaarado muhiim ah, hay’ado dowladeed, qaybta ganacsiga iyo ururada bulshada rayidka ee lagu aqoonsan yahay heshiisyada Qaramada Midoobay ee la xiriira cimilada.

Mas’uuliyiintu waxay sheegeen in nidaamkan cusub uu kordhin doono kalsoonida deeq bixiyeyaasha, uu xaqiijin doono hufnaanta iyo isla xisaabtanka iyo in mudnaanta la siin doono bulshooyinka ku jira safka hore ee halista isbeddelka cimilada. Soomaaliya ayaa tallaabadan ku muujisay dadaalkeeda ku aaddan dhismaha mustaqbal adkeysi leh oo waara.