Dowladaha Soomaaliya iyo Asarbayjaan ayaa magaalada Baku ku kala saxiixday heshiis taariikhi ah oo dhanka difaaca ah

Soomaaliya iyo Asarbayjaan ayaa kala saxiixday heshiis lagu xoojinayo xiriirka difaaca

 Arbacadii, magaalada Baku, dawladdaha Soomaaliya iyo Asarbayjaan waxay ku kala saxiixdeen heshiis iskaashi oo taariikhi ah oo dhanka difaaca ah, taasoo calaamad u ah tallaabo muhiim ah oo xiriirkooda ah.

Wasiirka Gaashaandhigga Soomaaliya C/qaadir Maxamed Nuur iyo Wasiirka Difaaca Asarbayjaan Zakir Hasanov ayaa heshiiska u kala saxiixday, iyadoo labada mas’uul ay ku tilmaameen inuu yahay horumar ballaaran oo dhanka difaaca iyo iskaashiga ciidamada iyo warshadaha.

Wasaaradda Gaashaandhigga Soomaaliya ayaa heshiiskan ku tilmaantay “heshiiska ugu weyn ee iskaashiga difaaca iyo warshadaha”, iyadoo xoogga lagu saarayo sidii loo kobcin lahaa awoodda ciidamada Soomaaliya. "Tani waxay dhabbaha u xaaraysaa taageerada farsamo ee la xoojiyey iyo isweydaarsiga aqoonta milatariga si kor loogu qaado awoodda difaaca Soomaaliya," ayay wasaaraddu ku tiri hadal ka soo baxay X.

Saxiixa ayaa yimid ka dib wadahadalo heer sare ah oo u dhaxeeyay madaxweynaha Soomaaliya Xasan Sheekh Maxamuud iyo madaxweynaha Asarbayjaan Ilham Aliyev horaantii Arbacada. Wadahadalkooda ayaa diiradda lagu saaray arrimo badan oo istaraatiiji ah oo ay ka mid yihiin xiriirka labada dal, iskaashiga tamarta cagaaran iyo iskaashiga difaaca. Marka laga soo tago heshiiska gaashaandhigga waxaa heshiis iskaashi oo dhanka waxbarashada ah kala saxiixday wasiirka arrimaha dibadda Asarbayjaan Jeyhun Bayramov iyo wasiirka arrimaha dibadda Soomaaliya Axmed Macallin Faqi.