Maamulada Puntland iyo Galmudug ayaa wadahadalo nabadeed uga furmay magaalada Gaalkacyo

 Wada hadal nabadeed oo u dhaxeeya Puntland iyo Galmudug oo lagu soo afjarayo colaad beeleedka ka taagan magaalada Gaalkacyo

Maamullada Puntland iyo Galmudug ayaa wadahadallo nabadeed uga billaabay magaalada Gaalkacyo, kuwaasoo ujeedkoodu yahay sidii loo soo afjari lahaa colaad beeleed dad badan ay ku dhinteen oo ka dhacday gobolka Mudug, kaasoo u dhexeeya maleeshiyaad kala taabacsan labada maamul.

Mas’uuliyiintii ka qeyb gashay wada-hadallada ayaa ku dheeraaday muhiimadda ay leedahay in wada-hadal lagu gaaro dib-u-heshiisiin iyo soo celinta nabadda deegaannada ay colaadaha qabaa’ilku saameeyeen.

Dagaalada qabaa’ilka ah ee ka socda guud ahaan dalka Soomaaliya ayaa ah caqabada ugu weyn ee dalka soo wajahday, maadaama ay khalkhal gelinayaan bulshada deegaanka, isla markaana ay wiiqayaan dadaallada lagu doonayo in lagu gaaro nabad iyo xasillooni heer qaran.