Wasiirka Amniga Gudaha Soomaaliya ayaa la kulmay Safiirka Dowladda Ingiriiska u fadhiya Soomaaliya Danjire Michael Nithavrianakis

 Wasiirka Amniga Gudaha Soomaaliya oo la kulmay Safiirka Britain si loo xoojiyo iskaashiga dhanka amniga

C/llaahi Sheekh Ismaaciil (Fartaag), Wasiirka Amniga Gudaha Xukuumadda Soomaaliya, ayaa la kulmay Safiirka Dowladda Ingiriiska u fadhiya Soomaaliya Danjire Michael Nithavrianakis, oo ay ka wada hadleen xoojinta xiriirka dhinaca ammaanka ee Soomaaliya iyo Ingiriiska.

Kulanka oo ka dhacay magaalada Muqdisho ayaa diiradda lagu saaray istaraatiijiyad lagu xoojinayo taageerada la siinayo hay’adaha amniga Soomaaliya, iyadoo ujeeddadu tahay sidii sare loogu qaadi lahaa xasilloonida Qaranka.

Labada mas’uul ayaa ku nuux-nuux saday muhiimadda ay leedahay dadaallada iskaashatooyinka ah ee looga hortagayo khataraha amniga, oo ay ku jiraan argagixisada iyo taageerada dhaqaale ee howlahan oo kale. Wasiir Furtaag ayaa uga mahadceliyey taageerada joogtada ah ee UK ay siiso ciidamada Booliska Soomaaliyeed iyo kuwa NISA, gaar ahaan qeybta Goudre oo kaalin mug leh ka qaadatay howlgallada amniga lagu sugayo.

Danjire Nithavrianakis ayaa carrabka ku adkeeyay sida ay UK uga go’an tahay ammaanka iyo xasilloonida Soomaaliya, isagoo caddeeyay muhiimadda ay leedahay sii socoshada iskaashiga dhinacyada tababarrada, qalabka iyo xog-wadaagga. Wadahadalku wuxuu sidoo kale taabtay hindisayaasha iskaashiga mustaqbalka, oo ay ku jiraan istaraatiijiyadaha lagula dagaallamayo maalgelinta argagixisada, kuwaas oo muhiimad weyn u leh amniga qaranka Soomaaliya.

Kulankaan ayaa waxa uu hoosta ka xariiqayaa sii xoojinta xiriirka ka dhaxeeya Soomaaliya iyo Ingiriiska, iyadoo iskaashiga dhanka amniga loo arko in uu laf dhabar u yahay xiriirkooda. Dooduhu waxay muujinayaan danaha labada dhinac ee horumarinta nabadda iyo xasilloonida gobolka Geeska Afrika, iyadoo miiska la saarayo tallaabooyin wax ku ool ah oo lagu xoojinayo awoodda amniga gudaha ee Soomaaliya.