Sarreeye Guuto Asad Othman Abdullah oo kulan xasaasi ah la qaatay Hogaamiyayaasha Saldhigyada iyo Qeybaha Booliska ee Caasimadda Muqdisho

 Taliska Booliska Soomaaliyeed ayaa ka hadlay istaraatiijiyadda amniga caasimadda Muqdisho

S/Guuto Asad Cismaan Cabdalla Taliyaha Ciidanka Booliska Soomaaliyeed ayaa kulan xasaasi ah la qaatay Hogaamiyayaasha Saldhigyada iyo qeybaha kala duwan ee Booliska,isagoona ka wada hadlay sidii loo xoojin lahaa Amniga Caasimadda korna loo qaado ka qaybgalka bulshada.

Taliye Asad ayaa ku nuux nuuxsaday in loo baahan yahay in boolisku ay dhowraan xuquuqda muwaadiniinta isla markaana ay si sharaf leh ula dhaqmaan maxaabiista. "Hadafkeenu waa inaan ilaalino oo aan ugu adeegno bulshada si daacadnimo iyo ixtiraam leh," ayuu yiri intii ay socotay doodaha. Marka sidaas la sameeyo, waxaan ku kasban karnaa kalsoonida iyo wada shaqeynta shacabka”.

Kulanka ayaa sidoo kale looga hadlay istaraatiijiyado ballaaran oo loo baahan yahay si kor loogu qaado ammaanka caasimadda, iyadoo diiradda lagu saarayo tallaabooyinka looga hortagayo dhibaatooyinka ka dhalan kara xasillooni darrada gobolka ka jirta.

Kulanka ayaa waxaa lagu soo bandhigay doorka Booliska oo aan kaliya ku koobneyn ilaalinta sharciga iyo kala dambeynta balse sidoo kale waxaa la sheegay in uu kaalin ku leeyahay dhismaha xiriirka wada shaqeyn ee shacabka Muqdisho.

Taliyaha Booliska Muqdisho Macalin Mahdi oo ka qeyb galay kulanka ayaa sheegay in ay taageersan yihiin hiigsiga Taliyaha, isagoo ku dheeraaday muhiimada ay leedahay in ciidamada Booliska ay ka barbar shaqeeyaan bulshada si ay u helaan faa’iido iyo badbaado.

Hindisahaan ay wadaan Ciidanka Booliska Soomaaliyeed ayaa hoosta ka xariiqaya isbeddelka istaraatiijiyadeed ee loo maray hab ku dhisan qaab beeleed iyo xuquuq dhowris oo lagu dhaqayo sharciga, iyadoo ujeedadu tahay dib u dhiska kalsoonida iyo xoojinta amniga Muqdisho.