Mudane Maxamuud Macallin Cabdallah, ayaa shir guddoominaya shir gaar ah oo uu la yeeshay qabanqaabiyeyaasha shirka qiimeynta degdegga ah

 U diyaar garowga Hay’adda Maareynta Masiibooyinka Soomaaliyeed Shirweynaha Qiimaynta Baahiyaha Musiibooyinka Kadib

Guddoomiyaha Hay’adda Maareynta Musiibooyinka Soomaaliyeed Mudane Maxamuud Macalin Cabdullaahi ayaa shir guddoominayay kulan gaar ah oo uu la qaatay qaban-qaabiyayaasha shirka qiimeynta baahiyaha degdega ah ee ka dib, kaasoo lagu wado inuu toddobaadkan ka furmo magaalada Muqdisho.

Kulanka ayaa diiradda lagu saaray ajandayaasha shirka iyo sidii gargaar deg deg ah loo gaarsiin lahaa dadka tabaaleysan iyo dadka ku barakacay gudaha Soomaaliya.

Kulanka ayaa waxaa goobjoog ka ahaa ku xigeenka ergeyga gaarka ah ee xoghayaha guud ee Qaramada Midoobay, ahna xiriiriyaha arrimaha bini’aadantinimada ee Qaramada Midoobay u qaabilsan Soomaaliya, George Conway, iyadoo ay wehliyaan wakiilo ka socday Bankiga Adduunka iyo wafdiga Midowga Yurub ee Soomaaliya.

Shirweynaha Qaran ee lagu qiimeynayo aafooyinka dalka ayaa ah mid muhiim u ah Soomaaliya, iyadoo la doonayo in lagu qiimeeyo baahiyaha ay qabaan dadka dalka ku nool marka ay dhacaan masiibooyinka dabiiciga ah iyo colaadaha oo ah dadka ugu nugul Soomaaliya.

Guddoomiyaha ayaa ku nuux-nuux saday muhiimadda uu shirkani leeyahay si loo xaqiijiyo awoodda dowladda Soomaaliya iyo saaxiibadeeda ay si hufan uga jawaabaan baahiyaha shacabka. "Waxaan u baahanahay inaan ka wada shaqeyno si aan u hubinno in dadka ugu nugul dalkeena aan laga tagin," ayuu yidhi.

Shirkan ayaa lagu wadaa in lagu soo bandhigo warbixino iyo falanqeyn dhinacyo badan leh oo ay ka mid yihiin saameynta is bedelka cimilada Soomaaliya, caqabadaha ay la kulmaan dadka ku barakacay gudaha dalka, iyo doorka beesha caalamka ee taageerada dadaallada lagu maareynayo musiibooyinka Soomaaliya.