Haaland ayaa ku guulaystay abaal marinta xidiga sanadka ee Premier League
Weeraryahanka kooxda Manchester City ee Erling Haaland, ahna horyaalka Ingiriiska ee Premier League, ayaa maanta oo Sabti ah la guddoonsiiyey ciyaartoygii ugu wacnaa ee tartankan ka qayb-galay, ka dib xilli ciyaareedkiisii ugu horreeyey ee tartankaas oo uu rikoodho badan ka jabiyey, isla markaana dhaliyey goolal badan oo City ku hoggaamiyey koobkii saddexaad oo xidhiidh ah.
Haaland, oo 22 jir ah, ayaa dhaliyay 36 gool 35 kulan oo uu ciyaaray xilli ciyaareedkan, isagoo jabiyay rikoorkii hore ee 34 gool ee hal xilli ciyaareed ee Premier League, kaasoo ay wadaagaan Andy Cole iyo Alan Shearer oo haystay ku dhawaad 34 sano.
Weerar yahanka reer Norway ayaa abaalmarintan ku mutaystay codadka dadweynaha, madaxda labaatanka kooxood ee horyaalka iyo guddi khubaro ah oo kubbadda cagta ah.
Ciyaartoyda City ayaa ku guuleystay abaalmarinta afar xilli ciyaareed oo xiriir ah, iyadoo Kevin De Bruyne uu ku guuleystay xilli ciyaareedkii 2019-2020 iyo 2021-2022 iyo Robin Diaz xilli ciyaareedkii 2020-2021.
Haaland waxa uu ka sare maray De Bruyne, labada ciyaaryahan ee Arsenal Bukayo Saka, Martin Odegaard, weeraryahanka Manchester United Marcus Rashford, weeraryahanka Tottenham Hotspur Harry Kane iyo daafaca Newcastle United Kieran Trippier.
Waxaa sidoo kale loo magacaabay ciyaaryahanka sannadka ee Ururka Qorayaasha Kubadda Cagta isagoo helay 82 boqolkiiba codadka.
Haaland waxa ay fursad u haysataa in uu kor u qaado dhibcaha uu ka dhaliyo horyaalka berri oo Axad ah, marka ay City booqato Brentford kulankeedii ugu dambeeyay ee tartanka xilli ciyaareedkan.
0 Comments