Golaha Mustaqbalka Soomaaliya oo Madaxweynaha U Qabtay Waqti Kama Dambeys ah Doorasho Qaran

Golaha Mustaqbalka Soomaaliya oo Madaxweynaha U Qabtay Waqti Kama Dambeys ah Doorasho Qaran

Magaalada Kismaayo ayaa martigelisay shir siyaasadeed muhiim ah oo ay yeesheen xubnaha Golaha Mustaqbalka Soomaaliya, kaas oo lagaga hadlay xaaladda siyaasadeed ee dalka iyo hannaanka doorashooyinka soo socda. Shirkan, oo socday intii u dhaxaysay 18 ilaa 20 December 2025, ayaa lagu soo saaray warmurtiyeed culus oo si toos ah ugu wajahan Madaxweynaha Soomaaliya, Xasan Sheekh Maxamuud.

Golaha ayaa ugu baaqay madaxweynaha inuu muddo hal bil gudaheed ah ku qabto kulan ay isugu yimaadaan dhammaan saamileyda siyaasadeed ee qaranka. Golaha wuxuu si cad u cayimay January 20, 2026 inay tahay waqtiga kama dambeyska ah ee lagu gaari karo heshiis qaran oo ku saabsan doorashooyin ku dhaca waqtigooda.

Warmurtiyeedka ayaa sidoo kale digniin u diray madaxweynaha, iyagoo sheegay in haddii baaqaasi la iska indho tiro, Golaha Mustaqbalka Soomaaliya uu qaadi doono tallaabooyin lagu abaabulayo hannaan doorasho oo looga hortagayo firaaq dastuuri ah, qalalaase amni, iyo kororka khatarta argagixisada.

Intii uu shirku socday, hoggaamiyeyaasha mucaaradka ayaa si qoto dheer uga dooday xaaladda guud ee dalka, gaar ahaan arrimaha doorashooyinka, amniga, dhaqaalaha, iyo bani’aadannimada. Waxay ku eedeeyeen madaxweynaha inuu ku fashilmay hoggaaminta dalka, isla markaana uu hirgeliyay siyaasado kala qeybin iyo takoor horseeday.

Goluhu wuxuu ku eedeeyay Madaxweyne Xasan Sheekh inuu wax ka beddelay dastuurka dalka, faragelinna ku sameeyay hay’adihii dastuuriga ahaa ee xakameyn lahaa awoodda fulinta. Sidoo kale waxay sheegeen in maamulkiisu oggolaaday in qaar ka mid ah dowlad-goboleedyada ay sii joogaan xafiiska iyagoo ka gudbay muddo xileedkoodii sharciga ahaa.

Dhanka amniga, Golaha Mustaqbalka Soomaaliya ayaa ku dooday in dagaalka ka dhanka ah Al-Shabaab uu istaagay, isla markaana la wiiqay awoodda ciidanka qalabka sida. Waxay arrintaas ku sababeeyeen musuqmaasuq, eex, iyo ku takri-fal awoodeed oo niyad jab weyn ku abuuray ciidamada.

Ugu dambeyn, Goluhu wuxuu caddeeyay inuu diyaar u yahay wadahadal lala yeesho madaxweynaha, si loo qabto doorasho loo dhan yahay, hufan, ka horumarsan tii 2022, isla markaana xoojinaysa matalaadda shacabka iyo sharciyadda baarlamaanka. Waxay ku adkeysteen in heshiis qaran uu yahay furaha xasilloonida siyaasadeed ee Soomaaliya.