Soomaaliya iyo Aljeeriya: Wada-shaqeyn Cusub oo Xoojinaysa Xiriirka Laba Dal

 Soomaaliya iyo Aljeeriya: Wada-shaqeyn Cusub oo Xoojinaysa Xiriirka Laba Dal

Madaxweyne Xasan Sheekh Maxamuud iyo Madaxweynaha Aljeeriya Cabdulmajiid Tabboun ayaa Talaadadii goob joog ka ahaa saxiixa heshiisyo taariikhi ah oo lagu xoojinayo iskaashiga labada dal ee Soomaaliya iyo Aljeeriya. Heshiisyadan ayaa diiradda saaraya waxbarashada, tamarta, xoolaha iyo beeraha, taas oo calaamad u ah bilow cusub oo xiriir istiraatiiji ah oo dhexmara labada dowladood.

Heshiisyada waxaa si rasmi ah u saxiixay wasiirrada Arrimaha Dibadda, Waxbarashada, Xoolaha iyo Shidaalka. Qodobada heshiiska ayaa u gogol xaaraya ballaarinta ganacsiga, horumarinta wax-soo-saarka beeraha, iyo kor u qaadista maalgashiga shidaalka iyo gaaska dabiiciga ah.

Mid ka mid ah qodobada muhiimka ah ee lagu heshiiyay ayaa ah in dadka sita baasaboorrada diblomaasiyadeed ee Soomaaliya ay heli doonaan fiisaha Aljeeriya marka ay halkaas tagaan, taas oo fududayn doonta xiriirka iyo socdaalka rasmiga ah ee labada dal.

Madaxweyne Xasan Sheekh Maxamuud ayaa uga mahadceliyay dowladda iyo shacabka Aljeeriya soo dhoweynta diirran iyo taageerada ay mar walba u muujiyaan Soomaaliya. Wuxuu xusay kaalinta muhiimka ah ee Aljeeriya ka ciyaartay difaaca danaha Afrika iyo taageerada ay siiso dalalka walaalaha ah.

Inta lagu guda jiray booqashada, Madaxweyne Tabboun ayaa ku dhawaaqay in Aljeeriya ay siin doonto Soomaaliya 500 deeqo waxbarasho, gaar ahaan kuliyadaha la xiriira beeraha, kalluumeysiga iyo cilmiga shidaalka — kuwaas oo muhiim u ah horumarka mustaqbalka ee dalka. Madaxweyne Xasan Sheekh ayaa sheegay in deeqahan ay yihiin calaamad saaxiibtinimo iyo wada-shaqeyn waarta.

Sidoo kale, Madaxweyne Xasan Sheekh ayaa amaanay hoggaanka Madaxweyne Tabboun ee ku aaddan hormarinta Sanduuqa Midnimada iyo Iskaashiga Afrika, isagoo sheegay in Soomaaliya ay rajeynayso inay ka faa’iideyso barnaamijkan si ay u xoojiso dadaallada dib u dhiska iyo horumarinta dalka.

Booqashadaas ayaa loo arkaa mid furaysa cutub cusub oo ka mid ah xiriirka Soomaaliya iyo Aljeeriya, iyadoo labada dowladood ay ballan qaadeen in ay sii xoojin doonaan iskaashiga dhaqaale, siyaasadeed iyo midka horumarineed ee gobolka guud ahaan.