Madaxweyne Xasan Sheekh oo Caalamka ugu Baaqay Kordhinta Maalgelinta Cimilada

Madaxweyne Xasan Sheekh oo Caalamka ugu Baaqay Kordhinta Maalgelinta Cimilada

Madaxweyne Xasan Sheekh Maxamuud ayaa shirkii labaad ee Cimilada Afrika (ACS2) ee ka dhacay Addis Ababa ku adkeeyey baahida degdegga ah ee loo qabo in beesha caalamku kordhiso maalgelinta cimilada, taas oo uu sheegay in ay tahay “qiyaas ku filan iyo shuruudo macquul ah.”

Madaxweynuhu wuxuu xusay in horumarka Afrika iyo dadaalka caalamiga ah ee lagu dhimayo qiiqa hawada aysan kala maarmin, isagoo tusaale u soo qaatay xaaladda adag ee Soomaaliya.

Wuxuu ku dheeraaday abaartii 2021–2023 oo saameysay 7.8 milyan oo qof, taas oo ka dhigan in ku dhowaad kala bar shacabka Soomaaliyeed ay la kulmeen gaajo, barakac iyo burbur dhaqaale.

Madaxweyne Xasan Sheekh ayaa soo bandhigay guulaha Soomaaliya ee dhinaca cimilada, sida Ololaha Cagaarinta Soomaaliya oo lagu beeri doono 10 milyan oo geed, ballanqaadka $10 milyan ee darbiga cagaaran ee Afrika, aasaasidda Sanduuqa Qaranka ee Cimilada, iyo iskaashiga $100 milyan ee Green Climate Fund oo la bilaabay 2024.

Wuxuu kaloo sheegay in Soomaaliya noqotay dalkii ugu horreeyey Bariga Afrika ee gudbiya qorshihiisa cusub ee NDC 3.0.

Madaxweynaha ayaa ugu baaqay dalalka caalamka in ay dhaqan geliyaan ballanqaadyada, isla markaana lacagaha lagu sheegay khasaaraha iyo magdhawga loo beddelo bixino joogto ah oo waqtigooda ku yimaada, gaarana dalalka sida tooska ah uga mid ah safka hore ee dhibaatada cimilada.

Madaxweyne Xasan Sheekh waxaa wehliyey wafdi heer sare ah oo ay ku jireen Ra’iisul Wasaare ku xigeenka Saalax Axmed Jaamac, Wasiirka Deegaanka Jeneral Bashiir Maxamed Jaamac, Wasiirka Arrimaha Dibadda C/ Salaan C/ Cali (Dhaay), Wasiirka Maaliyadda Biixi Iimaan Cige, iyo Safiirka Soomaaliya ee Itoobiya Cabdullaahi Warfa, taas oo lagu tilmaamay muujinta hoggaan mideysan oo dhinaca cimilada ah.