Taliyaha ciidamada ayaa la kulmay safiirka Ingiriiska u fadhiya Soomaaliya
Sarreeye Gaas Ibraahim Sheekh Muxuyidiin, Taliyaha Ciidanka Xoogga Dalka Soomaaliyeed, ayaa maanta oo Arbaca ah kulan la qaatay Safiirka Dowladda Ingiriiska u fadhiya Soomaaliya Danjire Mike Nithavrianakis, iyagoo ka wada hadlay dadaallada lagu xoojinayo amniga Soomaaliya.
Kulanka ayaa diiradda lagu saaray dhowr arrimood oo muhiim ah oo ay ka mid yihiin dib u dhiska ciidamada Soomaaliya iyo sidii UK ay u sii wadi lahayd taageerada dadaalladaas.
Labada dhinac ayaa aad ugu dheeraaday muhiimadda ay leedahay iskaashiga caalamiga ah ee lagu xoojinayo tayada ciidamada qalabka sida ee Soomaaliya, waxaana safiirka Britain uu tilmaamay inay ka go’an tahay Soomaaliya inay ka caawiso dagaalka ka dhanka ah argagixisada iyo sidii loo xasilin lahaa gobolka.
Wadahadalka ayaa sidoo kale lagu soo qaaday qorsheyaal dib loogu dayactirayo xerooyinka ciidamada, kuwaas oo muhiim u ah tababarada iyo howlgelinta ciidamada Soomaaliya.
Sarreeye Gaas Muxiyidiin ayaa sheegay inuu aad ugu faraxsan yahay kaalmada Britain ee joogtada ah, wuxuuna carrabka ku adkeeyay muhiimadda ay leedahay iskaashigan si loo gaaro nabad iyo xasillooni waarta ee Soomaaliya.
0 Comments